The Day of the Chuvash Book

Ҫӗртме уйӑхӗн 9-мӗшӗнче Чӑваш Республикин Наци библиотекинче Чӑваш кӗнеки кунне палӑртрӗҫ. Уявсен ярӑмӗнче ку ҫӗнӗ пулӑм. Ӑна библиотека ӗҫченӗсем тӗпчевҫӗсемпе пӗрле пӗлтӗр пуҫарса янӑччӗ.

Калаҫӑва хутшӑнакансем чӑваш кӗнекин историйӗ, аталанӑвӗ, пуласлӑхӗ ҫинче чарӑнса тӑчӗҫ.

Чӑваш Республикин наци библиотекин директорӗ Роза Лизакова уява уҫнӑ май ҫак ырӑ пуҫару пулнине палӑртрӗ: «Чӑваш кӗнеки кунне эпир Ермей Рожанский миссионер, куҫаруҫӑ ячӗпе ҫыхӑнтаратпӑр. «Чӑваш кӗнекин аслашшӗ» тесе хаклать ӑна Виталий Родионов тӗпчевҫӗ. Ермей Иванович тӑрӑшнипе 1769-мӗш ҫулта Питӗрте «Сочинения, принадлежащие к грамматике чувашского языка» пӗрремӗш чӑваш кӗнеки пичетленсе тухнӑ, вулакан патне вӑл ҫӗртме уйӑхӗнче ҫитнӗ. Рожанский хӑй те ҫӗртме уйӑхӗнче ҫуралма пултарнӑ текен шухӑш пур. Ҫавӑнпа та уява ҫулсерен ҫӗртме уйӑхӗнче ирттерме палартнӑ».

Геронтий Никифоров, Чӑваш Республикин тава тивӗҫлӗ вӗрентекенӗ Ермей Рожанский ӗҫӗ-хӗлӗпе тата вӑл хатӗрленӗ «Сочинения, принадлежащие к грамматике чувашского языка» кӗнекепе тӗплӗнрех паллаштарчӗ.

Наци литературипе библиографи пайӗн ертӳҫи Галина Соловьева Чӑваш Республикин наци библиотеки чӑваш кӗнекине халӑх патне ҫитерес, пулас ӑру валли упраса хӑварас тӗлӗшпе туса ирттерекен ӗҫсем ҫинче чарӑнса тӑчӗ. Вӑл библиотека ӗҫченӗсем 1769-мӗш ҫултан пуҫласа паянхи кунччен пичетрен тухнӑ кӗнекесене шута илсе пынине, тӗрлӗ регионсенче ӑҫта упраннине палӑртни ҫинчен, библиотекӑн электронлӑ каталогӗпе тата ытти ресурсӗсемпе сайт урлӑ паллашма май пурри ҫинчен пӗлтерчӗ.

Чӑваш патшалӑх гуманитари ӑслӑлӑхӗсен институчӗн ӗҫченӗ, филологи ӑслӑлӑхӗсен кандидачӗ Ирина Кириллова, институт хатӗрлесе кӑларнӑ кӗнекесемпе паллаштарчӗ, хальхи тапхӑрта мӗнле темӑсемпе ӗҫлени ҫинчен каласа кӑтартрӗ.

Халӑха, вулавӑшсене чӑваш кӗнекипе тивӗҫтерекен ҫӑлкуҫ вӑл – Чӑваш кӗнеке издательстви. Пӗр ӗмӗртен каҫнӑскер паян та вӑл аталану ҫулӗпе ҫирӗп утать, ҫулсерен пуян та паха кӑларӑмсем хатӗрлет. Издательство ӗҫӗ-хӗлӗ ҫинчен Ольга Федорова редактор каласа пачӗ.

Ӗҫлӗ калаҫӑва хутшӑнакансем Чӑваш кӗнеки кунӗ хальлӗхе анлӑ сарӑлманнине палӑртрӗҫ, ҫапах та пурӑна-киле ку уяв та халӑх пурнӑҫӗнче хӑйӗн тивӗҫлӗ вырӑнне тупасса шанса калаҫрӗҫ.